Hökumət ölkədə iğtişaşların qarşısını almaq və günahkarları məsuliyyətə cəlb etmək üçün yeni, sərt tədbirlər qəbul edib.

"Unikal" xəbər verir ki, bunu İtaliyanın Baş naziri Corcia Meloni bəyanat yayaraq bildirib.

Bu qərar Milan və digər İtaliya şəhərlərində baş verən toqquşmalardan, mağazaların talan edilməsindən və hüquq-mühafizə orqanları əməkdaşlarına edilən hücumlardan sonra qəbul olunub.

Meloninin sözlərinə görə, iğtişaşlar nəticəsində təxminən 200 hüquq-mühafizə orqanı əməkdaşı xəsarət alıb. "Confcommercio" ticarət assosiasiyasının hesablamalarına əsasən, təkcə Milanda dəymiş ziyan təxminən bir milyon avro təşkil edir. Hüquq-mühafizə orqanları 330 nəfəri həbs edib. Baş nazir qeyd edib ki, saxlanılanların təxminən yarısı əcnəbi vətəndaşlardır.

"Biz Milan və digər İtaliya şəhərlərində baş verən zorakılıqların görüntülərini gördük: talan edilmiş mağazalar, sındırılmış vitrinlər və hüquq-mühafizə orqanları əməkdaşlarına qarşı hücumlar. Bunlar heç kimin əhəmiyyətini azaltmağa və ya əsaslandırmağa cəhd edə bilməyəcəyi, qəbuledilməz mənzərələrdir", - deyə Meloni qeyd edib.

Hökumətin qəbul etdiyi yeni tədbirlərə əsasən, ictimai etirazlar zamanı azı beş nəfərdən ibarət qrupun tərkibində zorakılıq hərəkətlərində iştirak etmək beş ilə qədər həbs cəzası və 20 000 avroya qədər cərimə ilə nəticələnə bilər. Əgər iştirakçılar üzlərini gizlədibsə və ya başqalarına fiziki xəsarət yetiribsə, cəza daha da sərt olacaq.

Həmçinin müəyyən edilib ki, yetkinlik yaşına çatmayanların vurduğu ziyanlara görə valideynlər maliyyə məsuliyyəti daşıyacaqlar. İlin sonuna qədər Milana əlavə olaraq 500 hərbi qulluqçu cəlb olunacaq, yetkinlik yaşına çatmayanlarla bağlı ədliyyə sistemi isə daha çox hakim və müvafiq qurumlarda əlavə imkanlarla gücləndiriləcək. Baş nazir, iğtişaşlar zamanı müəyyən edilən ən gənc iştirakçının cəmi 11 yaşında ola biləcəyi barədə xəbərlərdən xüsusi narahatlığını ifadə edib.

"Biz uşaqların elə böyüməsinə yol verə bilmərik ki, onlar mağaza vitrinini sındırmağı hörmət qazanmaq yolu, yaxud sosial mediada baxış sayı toplamağı öz gələcəklərindən daha vacib hesab etsinlər", - deyə o vurğulayıb.

Eyni zamanda, Meloni qeyd edib ki, hökumət dinc etirazlarda iştirak edənlərin narahatlıqlarına həll yolu tapmaq məqsədilə onlarla dialoqa girməyə hazır olduğunu açıqlayıb: "Sosial çətinliklər heç vaxt zorakılığa haqq qazandıra bilməz. Mağaza vitrini sındırılanda bunun bədəlini hansısa nüfuzlu məmur yox, məhz dükan sahibi, işçi və yerli sakinlər – yəni bəzilərinin guya müdafiə etdiyini iddia etdiyi sadə insanlar ödəyir", – deyə İtaliyanın Baş naziri qeyd edib.

Meloni sözlərini belə yekunlaşdırıb: "Dinc etirazlarda iştirak etmək bir hüquqdur, lakin şəhərlərimizi xarabalığa çevirmək belə deyil".

Ağarza Elçinoğlu