"Ötən illər ərzində Azərbaycan dini və mədəni müxtəlifliyə hörmətin, qarşılıqlı anlaşmanın və multikultural dəyərlərin qlobal miqyasda təbliği missiyasını şərəflə yerinə yetirmişdir. Bu günə qədər keçirilmiş bir çox beynəlxalq konfrans və forumlar ölkəmizin bu sahədə fəal və təşəbbüskar aktor olduğunu sübut edir. Xüsusilə, Azərbaycan Respublikasının Prezidenti Zati-aliləri cənab İlham Əliyevin təşəbbüsü ilə irəli sürülmüş və qısa müddətdə qlobal dialoq və əməkdaşlıq modeli kimi beynəlxalq səviyyədə tanınmış “Bakı Prosesi” çərçivəsində xalqımız Ümumdünya Mədəniyyətlərarası Dialoq Forumlarına, UNAOC-un Qlobal Forumuna və Dünya Dini Liderlərinin Sammitlərinə uğurla ev sahibliyi etmişdir". 

"Unikal" xəbər verir ki, bunu Dini Qurumlarla İş üzrə Dövlət Komitəsinin sədri Ramin Məmmədov VII Ümumdünya Mədəniyyətlərarası Dialoq Forumu çərçivəsində "Dinlərin dialoqu: Ortaq gələcəyə yol xəritəsi" adlı sessiyada deyib.

Onun sözlərinə görə, bu ortaq yolda cənab Migel Moratinosun xidmətlərini və qlobal dialoqun inkişaf etdirilməsinə olan sarsılmaz sədaqətini yüksək qiymətləndiririk:

"Eyni zamanda, onun BMT-nin İslamofobiya ilə mübarizə üzrə xüsusi elçisi təyin edilməsi onun şəxsi əqidəsinin və UNAOC-un bütün dünyada dini dözümsüzlüyə və ayrı-seçkiliyə qarşı qətiyyətli mövqeyinin bariz sübutudur. Bu möhkəm tərəfdaşlığa əsaslanaraq, Azərbaycanın qlobal həmrəyliyin və strateji dialoqun inkişafına yönəlmiş ortaq sədaqətimizi daha da gücləndirərək 2027-ci ildə növbəti UNAOC Qlobal Forumuna Bakıda ev sahibliyi edəcəyindən xüsusi qürur duyuruq.

Bu xüsusda, İslamofobiya, nifrət nitqi və ayrı-seçkiliyə qarşı mübarizənin beynəlxalq səviyyədə həmrəylik və vahid mövqe tələb etdiyini ardıcıl olaraq vurğulayan Prezident İlham Əliyevin strateji baxışına və güclü siyasi iradəsinə əsaslanaraq, Azərbaycan bu idealları fəal şəkildə dəstəkləyir. Ölkəmiz UNAOC-un qabaqcıl qlobal mexanizmlərini, o cümlədən BMT-nin Antisemitizmlə Mübarizə üzrə Monitorinq və Cavab Tədbirlərinin Gücləndirilməsi üzrə Fəaliyyət Planını, həmçinin İslamofobiya ilə Mübarizə üzrə BMT Fəaliyyət Planının hazırlanması istiqamətində davam edən səyləri qətiyyətlə dəstəkləyir. Biz dünyanın müxtəlif regionlarında islamofobiyaya, dini dözümsüzlüyə, ksenofobiyaya və ayrı-seçkiliyə qarşı mübarizədə Alyansı dəstəkləyirik.
UNAOC ilə birlikdə bu plenar iclasa həmsədrlik etməkdən və bu əlamətdar tədbirə ev sahibliyi etməkdən məmnunluq duyuruq". 

Dövlət Komitəsinin sədri əlavə edib ki, uzunmüddətli münaqişədən çıxmış ölkə olaraq Azərbaycan sülhün əsl dəyərini və mədəni-mənəvi irsin itirilməsinin doğurduğu dərini ağrını yaxşı bilir.

"Biz xalqın müqəddəs kimliyini və yaddaşını daşıyan dini abidələrin və ibadət ocaqlarının dağıdılmasına şahid olmağın nə demək olduğunu çox gözəl başa düşürük.

Tarixi ədalətə və mədəni irsin qorunub saxlanılmasına sadiqliyimizdən irəli gələrək, dini irsin bərpası və mühafizəsi postmünaqişə siyasətimizin mərkəzində dayanır. Dəyərlərimizə hörmətin əyani nümayişi olaraq, azad olunmuş ərazilərimizdəki genişmiqyaslı bərpa prosesinə məhz dini abidələrimizin bərpasından başlanılmışdır. Azərbaycan bu torpaqlarda mənsubiyyətindən asılı olmayaraq bütün dini abidələrin bərpasına böyük həssaslıq və sadiqliklə yanaşır.

Bizim üçün bu, konkret dövlət siyasəti çərçivəsində reallaşdırılan praktik mənəvi diplomatiyanın, sosial yaraları sarımağın, mədəni kimliyi bərpa etməyin, regionda uzunmüddətli sabitliyi və qarşılıqlı etimadı gücləndirməyin sarsılmaz öhdəliyi, sülhün və birgəyaşayışın təminatına verilən real töhfədir.

Biz inanırıq ki, dövlət hakimiyyəti və dini liderlik ümumi bəşəri dəyərlər ətrafında birləşdikdə, din xadimləri qlobal miqyasda insan ləyaqətini və bərabərliyini uca tutaraq, ixtilaf deyil, həqiqi mənada sülh elçiləri kimi çıxış edə bilərlər. Bu həqiqət COP29 çərçivəsində 2024-cü ildə təşkil olunmuş “Dünya dinləri yaşıl planet uğrunda” Dünya Dini Liderlərinin Qlobal Bakı Sammitində də öz təsdiqini tapdı. Bu mühüm tədbir sübut etdi ki, belə tərəfdaşlıqlar dini icmaları bəşəriyyətin ortaq gələcəyi naminə vahid mənəvi platformada birləşdirmək gücünə malikdir", - deyə R. Məmmədov bildirib.