Rusiyada anadan olmuş, Çikaqoda yaşayan özəl kapital investoru Konstantin Sokolov Mərkəzi Asiyada ticarət dəhlizinin inkişafı üçün 200 milyon dollardan çox xərclərə nəzarət edəcək ABŞ Dövlət Departamentinin yeni vençur kapital fondunun (Tripp+) prezidenti təyin edilib. 

"Unikal" xəbər verir ki, "The Guardian" qəzetinin məlumatına görə, vəsait nəqliyyat, enerji infrastrukturu və vacib mineral ehtiyatlarına investisiya qoymaq üçün istifadə olunacaq. 

Dövlət Departamenti onun təyinatını təsdiqləyib.

Donald Trampın sözlərinə görə, Sokolov Ağ Evin "bal salonu" tikinti layihəsinə 350 milyon dollardan çox ianə edən 36 donordan biridir.

Sokolov "bal zalı" layihəsinin dövlət vəzifəsi alan sonuncu donoru olub. Onun ianəsinin məbləği açıqlanmayıb. O, əvvəllər heç vaxt dövlət vəzifəsi tutmayıb.

Sokolov "The Guardian" qəzetinə müsahibə verməkdən imtina edib və təyinatı ilə bağlı sualları cavablandırmayıb. Ağ Ev isə bütün sualları Dövlət Departamentinə yönləndirib. 

Təsisçisi və prezidenti Sokolov olan Tripp+ Enterprises fondu adını Ermənistan və Azərbaycandan keçən 27 mil (təxminən 43 km) uzunluğunda ticarət dəhlizi olan "Tramp Yolu" layihəsindən götürüb.

Dövlət Departamentinin nümayəndəsi 201 milyon dollarlıq fondun Ermənistan, Azərbaycan, Gürcüstan, Qazaxıstan, Qırğızıstan, Tacikistan, Türkmənistan və Özbəkistan da daxil olmaqla Cənubi Qafqaz və Orta Asiyada strateji özəl sektorun inkişafını təşviq etmək üçün kreditlər, səhm investisiyaları və qrantlar vermək səlahiyyətinə malik olduğunu açıqlayıb.

Qeyd olunur ki, Konstantin Sokolov Ermənistanın ən böyük telekommunikasiya şirkəti olan "Viva Armenia"nın əsas səhmdarlarından biridir, Avropa ilə Afrika arasında təmiz enerji və fiber-optik sualtı kabel layihəsini həyata keçirən "Northern Pillar Energy Consortium"da rəhbər vəzifələr tutur və eyni zamanda "Pelagos Data Centres" şirkətinin prezidentidir.

Bundan əlavə, Sokolov gələcəyin enerji və telekommunikasiya sektorlarında ixtisaslaşmış Çikaqoda yerləşən "IJS Investments" investisiya firmasının, eləcə də maliyyə xidmətləri, enerji və qlobal daşınmaz əmlak sektorlarında fəaliyyət göstərən İsveçrə investisiya firması "Gotthard Investment AG"nin təsisçisidir.

Dövlət Departamentinin nümayəndəsinin sözlərinə görə, fond illik hesabatlar, müstəqil auditlər, eləcə də qrantların verilməsi və maraqların toqquşmasının qarşısının alınması qaydaları da daxil olmaqla bütün qanunvericilik tələblərinə əməl edəcək.

Sokolov 20 ildən çoxdur ki, investor kimi çalışır, beynəlxalq infrastruktur və telekommunikasiya layihələrində iştirak edir. Onun tərcümeyi-halında hökumətlərə və iri şirkətlərə strateji məsləhət xidmətləri göstərmək təcrübəsi də var.

Nəşr həmçinin qeyd edir ki, ötən ilin avqust ayında Ağ Evin vasitəçiliyi ilə Ermənistanla Azərbaycan arasında sülh müqaviləsi imzalandıqdan sonra Tramp administrasiyası Ermənistanla münasibətləri dərinləşdirmək üçün artıq görünməmiş addımlar atıb. 

İnvestor Ben Blekin rəhbərlik etdiyi ABŞ İnkişaf Maliyyə Korporasiyası (DFC) öz növbəsində Tripp İnkişaf Şirkətini yaratmağı planlaşdırır. Yeni yaradılan qurum Ermənistan, Türkiyə və Azərbaycanının digər ərazilərini Naxçıvanla birləşdirəcək təklif olunan dəhliz boyunca dəmir yolu və digər infrastruktur inşa edəcək.

Sokolovun Tripp+ Fondunun rəhbəri təyin edilməsi, ABŞ-nin Qərbi Asiyanı Avropa ilə birləşdirən strateji nəqliyyat dəhlizinin inkişafını dəstəkləməyə çalışdığının daha bir göstəricisi kimi qəbul edilir.

Ağarza Elçinoğlu