Selena Qomezin psixi sağlamlıq sahəsində fəaliyyət göstərən "Wondermind" startapına investisiya yatıran bir neçə investor cümə axşamı pop ulduzunu məhkəməyə verib. İnvestorlar iddia edirlər ki, onlara startapın uğuru və Qomezin şirkətdəki iştirakı barədə yanlış məlumat verilib.
"Unikal" CNN-ə istinadən xəbər verir ki, iddia ərizəsinə görə, "Wondermind" 2021-ci ildə yaradılıb və Qomez şirkətin həmtəsisçisi, “təsir üzrə baş direktoru” və marketinq rəhbəri kimi təqdim olunub.
Şirkətin veb-saytında qeyd olunur ki, media platforması istifadəçilərə “hər gün psixi sağlamlıqlarını prioritetə çevirmək üçün asan və tətbiq edilə bilən üsullar” təqdim etmək məqsədi daşıyıb. Saytda ziyarətçilər xəbər bülleteni üçün qeydiyyatdan keçməyə yönləndirilir.
Beş investor məhkəməyə müraciət edərək bildiriblər ki, 2022-ci ildə şirkətə ümumilikdə 1,2 milyon dollar sərmayə qoyublar. Onlar Qomezin məşhurluğundan və sosial şəbəkələrdəki böyük izləyici kütləsindən istifadə edərək şirkətin inkişafına töhfə verəcəyini gözləyiblər.
Lakin iddiaya görə, “şirkət ətraflarında səssizcə çökdüyü üç il ərzində onun təsisçilərindən, rəhbərlərindən və ya direktorlarından heç biri bu çöküşü maliyyələşdirən investorların pulunun vəziyyəti barədə bir söz deməyib”.
İnvestorlar həmçinin Qomezin anası və şirkətin həmsədri olan icraçı direktoru Mendi Tifini, eləcə də keçmiş biznes tərəfdaşı Daniella Piersonu məhkəməyə veriblər. Onlara qarşı qiymətli kağızlarla bağlı dələduzluq, ümumi hüquq normaları çərçivəsində dələduzluq, müqavilə öhdəliklərinin pozulması və digər ittihamlar irəli sürülüb. İddiaçılar yatırdıqları vəsaitin geri qaytarılmasını, həmçinin dəymiş zərərin və hüquqi xərclərin ödənilməsini tələb edirlər.
