Mineralnıye Vodıdan Antalyaya uçan Rusiyanın "Azimuth" aviaşirkətinə məxsus təyyarədə bomba xəbərdarlığı yalan olub.
"Unikal" Türkiyə mətbuatına istinadən xəbər verir ki, təyyarə Antalya hava limanına eniş etdikdən sonra sərnişinlər və heyət üzvləri təxliyə edilib, lakin yoxlama zamanı heç bir partlayıcı maddə aşkar edilməyib.
Təhdid RA-89120 qeydiyyat nömrəli "Sukhoi Superjet 100" təyyarəsinin uçuşu zamanı alınıb.
Təyyarədə 65 sərnişin və dörd heyət üzvü olub. Məlumatı aldıqdan sonra Türkiyə hakimiyyəti ehtiyat tədbirləri görüb və təyyarəni izləməyə başlayıb.
Antalya Hava Limanının ikinci uçuş-enmə zolağına eniş etdikdən sonra təyyarə 5 nömrəli təhlükəsiz dayanacaq sahəsinə yönləndirilib. Təyyarədə olanların hamısı təxliyə edilib, bundan sonra təhlükəsizlik işçiləri təyyarədə axtarış aparmağa başlayıblar.
Məlumata görə, təyyarəyə baxış zamanı heç bir partlayıcı maddə və ya şübhəli əşya aşkar edilməyib.
Daha əvvəl "HavaSosyalMedya" portalı təyyarənin Türkiyə hava məkanında olarkən partlayıcı qurğunun olması barədə siqnalın alındığını bildirmişdi. Müvafiq bölmələr yüksək hazırlıq vəziyyətinə gətirilmişdi.






















.jpg)























